වත්ත ජාවාරමට බදු දී සෞඛ්යයට දත නියවීම
මෙරට උසස් අධ්යාපන හා සෞඛ්ය ක්ෂේත්ර තුළ මහත් ආන්දෝලනයකට තුඩු දුන් මාලබේ පෞද්ගලික වෛද්ය විද්යාලය සම්බන්ධ අර්බුදය පිළිබඳ සොයා බැලීමට පත් කළ පංච පුද්ගල කමිටු වාර්තාව ජනාධිපතිවරයා අතට පත්ව ඇත. කමිටුව පත් කරනු ලැබුවේ සෞඛ්ය අමාත්යවරයායි. කමිටුවේ ප්රධානියා වූ සෞඛ්ය අමාත්යාංශයේ ලේකම් වෛද්ය රවින්ද්ර රුබේරු, කමිටු සාමාජිකයන් වූ හිටපු නියෝජ්ය අධ්යක්ෂ ජෙනරාල් වෛද්ය එච්. ආර්. යූ ඉන්ද්රසිරි, පශ්චාත් වෛද්ය උපාධි ආයතනයේ අධ්යක්ෂ මහාචාර්ය ජයන්ත ජයවර්ධන, ලෝක සෞඛ්ය සංවිධානයේ හිටපු අධ්යක්ෂ වෛද්ය පාලිත අබේකෝන් සහ සෞඛ්ය අමාත්යංශයේ නීති නිලධාරී ඒ. ආර් අහමඞ් යන සෞඛ්ය ක්ෂේත්රයේ ප්රාමාණිකයන් ඉදිරිපත් කළ වාර්තාවක වැදගත් කම අමුතුවෙන් පෙන්වා දිය යුතු නොවේ.
මාලබේ පෞද්ගලික වෛද්ය විද්යාලය සම්බන්ධයෙන් රජයේ වෛද්ය නිලධාරීන්ගේ සංගමයත්, ශ්රී ලංකා වෛද්ය සභාවත්, එම වෛද්ය විද්යාලයේ ඉගෙනුම ලැබූ සිසුන්ගේ දෙමාපියනුත් ප්රකාශ කළ කරුණු ද මාධ්ය මගින් හෙළි කළ කරුණු ද සම්පූර්ණ සත්ය බව මෙම පංච පුද්ගල කමිටුව සනාථ කර ඇත.
මාලබේ වෛද්ය විද්යාලයේ පරිපාලනය මුල සිටම නිරතව සිටි වංචා සහගත ක්රියාන්විතයන් බොහොමයක් කමිටුවේ නිරීක්ෂණයට භාජනය වීම පිළිබඳව අපි සතුටු වෙමු. එහෙත් කමිටුවේ නිරීක්ෂණයන්ට පරස්පර වූ නිගමනයන් ඉදිරිපත් කිරීමට කමිටුව කටයුතු කළේ ඇයිද යන්න ප්රශ්න සහගතය. කමිටුවේ නිගමනයන් පිටස්තර පුද්ගලයකු විසින් සම්පාදනය නොකළේ නම් එය සිදු කොට ඇත්තේ යම් තැනැත්තකුට හෝ ආයතනයකට ඇති පක්ෂපාතීත්වය නිසා බැව් වාර්තාව සම්පූර්ණයෙන්ම කියවන්නකුට අවබෝධ වීම වැළැක්විය නොහැක.
මාලබේ පෞද්ගලික වෛද්ය විද්යාලය විසින් ආයෝජන මණ්ඩලය රවටන ලද ආකාරය කමිටුව නිරීක්ෂණය කර ඇත. 2008 වසරේදී දකුණු ආසියානු තාක්ෂණ සහ (more…)
